Komuna e Prishtinës sqaron ndërprerjen e kontratave në “Ku’zina

16:57 | 13 Qershor 2025
Q L

Komuna e Prishtinës ka reaguar pas raportimeve për ndërprerje të kontratave të punës në Ndërmarrjen Publike Lokale “Ku’zina” Sh.A., duke sqaruar se bëhet fjalë për përfundimin e kontratave të përkohshme të lidhura me një projekt specifik.

“Punëtorët e angazhuar kanë qenë të përfshirë vetëm për këtë qëllim të përkohshëm dhe jo në funksion të përhershëm të ndërmarrjes. Përfundimi i këtyre kontratave është proces i zakonshëm që ndodh me përfundimin e një projekti të përkohshëm, dhe nuk ndikon në funksionimin e rregullt të ndërmarrjes.”, thuhet në njoftimin e tyre.

Nga Komuna u theksua se ky është një proces i zakonshëm dhe nuk ndikon në funksionimin e rregullt të ndërmarrjes, e cila sipas tyre, po operon me kapacitete të plota dhe është në përgatitje për zgjerimin e shërbimeve ushqimore për qytetarët./Arbresh.info